Viser til eller syner til?
Eg skriv helst syner i staden for viser på nynorsk, som i «det syner seg at det er best». Men når det handlar om å referera til noko, skriv eg viser til. Er det rett?
Svar
Ja, det er heilt rett å visa til noko på nynorsk.
Det er bra å skriva syna, men visa er òg eit nynorskord. Visa er ofte jamgodt med syna – og somme tider betre.
I uttrykket med til er det best å bruka visa. Det heitte at vísa til alt i gamalnorsk. Det er altså ingen inkonsekvens å skriva visa til, men elles syna.
I uttrykket visa bort (jf. utvisa) er visa heilt obligatorisk.
Ein må ikkje gløyma at begge verba har e-bøying:
å syna/syne – syner – synte – har synt
å visa/vise – viser – viste – har vist
Det er altså gale å skriva *synar og *visar i presens!
Del denne siden
